Зерттеу мақсаты: Қазақстан Республикасы Бәсекелестікті қорғау және дамыту агенттігі (БҚДА) іске асырған бәсекелестікті қорғау шараларының экономикалық әсерін бағалау.
Жоба аясында ЭЫДҰ, CMA, FTC және Еуропалық комиссия әзірлеген әсерді бағалаудың халықаралық әдістемелері Қазақстан жағдайына бейімделіп, бәсекелестікті қорғау саласындағы үш кейс негізінде сынақтан өткізілді: үстем жағдайды теріс пайдалану (Air Astana), экономикалық шоғырлану (Қазақтелеком/Kcell) және картельдік сөз байласу (сұйытылған мұнай газын бөлшек саудада сатушылар).
Жоба сондай-ақ БҚДА-ның бәсекелестік саясаты саласында қабылданатын шаралардың экономикалық әсеріне тұрақты түрде сандық бағалау жүргізуіне мүмкіндік беретін орнықты ішкі жүйені қалыптастыруға бағытталды.
Зерттеу міндеттері:
Бәсекелестік саясаты шараларының әсерін сандық бағалаудың халықаралық әдістемелерін Қазақстан жағдайына бейімдеу;
Іріктелген үш кейс бойынша талдамалық деректерді жинау, жүйелеу және дайындау; таңдалған кейстерге егжей-тегжейлі сандық бағалау жүргізу; үстем жағдайды теріс пайдалану, экономикалық шоғырлану және картельдік сөз байласу бағыттарын қамтитын үш талдамалық кейсті әзірлеу;
БҚДА қызметкерлеріне арналған оқу материалдарын әзірлеу және ex ante (алдын ала) және ex post (кейінгі) әсерді бағалау бойынша семинар өткізу;
Қорытынды есепті және БҚДА қызметінде әсерді бағалау тәсілдерін одан әрі қолдану бойынша әдістемелік ұсынымдарды дайындау.
